Location: Alam Takambang Jadi Guru, Dima Bumi Dipijak, Disinan Langik Dijunjuang......
Posts: 808
Rep Power: 20
Kato Pusako (34) : Urang Mudo
Spoiler for Isi:
Nan mudo pambimbiang dunie
Nan capek kaki nan ringan tangan
Capek kaki indak panaruang
Ringan tangan indak pamacah
aso tarantang duo sudah
Nan bahati suci bamuko janiah
Acang-acang dalam nagari
Elok tapian dek urang mudo
Baumue satahun jaguang
Badarah satampuak pinang
Tinggi tabao dek rueh
Gadang tabao dek dagiang
gapuak tabao dek lamak
Bak gadih jolong basubang
Bak bujang jolong bakarih
Dikacak langan lah bak langan
Dikacak batih lah bak batih
alun dipanjak asok kumayan
Bapaham bak gatah caie
Bak kambiang hargo duo kupang
Bak kambiang baharago tigo tali
Gadang hak dilamhuak
Tinggi bak dianjuang
Bak padi disiang duo kali
Bak jaguang baumue tangah duo bulan
Lah tuo pado kakak
Lah cadiak pado mamak
Baranang itiak dalam rawang
Di bawah tabek nan bagauang
Sapantun bujang mangapalang
dima tagak kumari cangguang
Diliek pulo nan gadih-gadih
Rintang manjaik jo manyulam
Bunyi galak badarai-darai
ado bagarah bakucindan
Maklum anak mudo-mudo
Digilo gurau samo gadang
Hari lah habih dek kucikak
Hati gabuak pikiran sanang
Alun ado bahati susah
Katiko bungo sadang kambang
Banyaklah kumbang nan ka inggok
Hati-hati manjago diri
Jan tacurah bak katidiang
Jan baserak bak anjalai
Sio-sio utang tumbuah
Galuik kok jadi pacakak-an
Kok basuo jodoh nan sasuai
Ka jadi subang jo galang
Naknyo canggiah di kalingkiang
Karatau madang di hulu
Babuah babungo balun
Marantau bujang daulu
Di rumah baguno balun
Kok mati bujang di rantau
Hujan di langik mamandikan
langau hijau nan kamanjanguak
Location: Alam Takambang Jadi Guru, Dima Bumi Dipijak, Disinan Langik Dijunjuang......
Posts: 808
Rep Power: 20
Kato Pusako (35) :Kabanaran (Nan Bana)
Spoiler for Isi:
Nan disabuik bana adolah
Partamo jujur
Kaduo luruih
Katigo malatakkan sasuatu di tampeknyo
Kaampek lawan bana duto
Asa bana datangnyo dari ampek
macam Partamo dari dalie Tuhan
Kaduo dari Hadih Rasul
Katigo dari kato pusako
Kaampek dari kato mupakaik
Timbue bana dari ampek caro
Partamo dari pikie palito hati
Kaduo nanang hulu bicaro
Katigo haniang saribu aka
Kaampek dek saba bana nan datang
Nan manjauahkan bana ado ampek macam
Partamo karano takuik jo malu
Kaduo karano kasiah jo sayang
Katigo dek balabo karano rugi
Kaampek karano dek dipuji jo disanjuang
Hilang bana dikaranokan ampek macam
Partamo karano banyak bicaro
Kaduo karano kurenah bicaro
Katigo karano muluik manih atau tipu dayo
Kaampek karano bicaro indak hati-hati
Ukue jangko kabanaran
Nak luruih rantangkan tali
Nak tinggi tingkekkan budi
Nak haluih babaso basi
Nak elok lapangkan hati
Nak mulie tapek-i janji
Nak taguah paham dikunci
Nak labo bueklah rugi
Nak kayo kuaik mancari
Nak tuah batabue pudi
Nak namo tingkekkan jaso
Nak pandai rajin baguru
Caro mamakai ukue jangko
Kok mamahek tantang barih
Kok batanam di dalam paga
Kok nak elok salendang dunie
Kok nak ulam pucuak manjulai
Kok nak aie pincuran tabik
Kok nak cincin galanglah dapek
Kok nak kilek cahayo tibo
Kok nak licin bakilek timbue
Kok nak salasai barundiang nan elok
Cinto sampai kandak balaku
Bumi sanang alam santoso
Dunie akiraik jadi santoso
Hilang kabanaran kalua dari ukue jangko
Babicaro bak balalai gajah
mangecek bak katiak ula
Bakato kapalang aka
Bapikie dek hilang saba
Bailimu kapalang aja
Rumah tampak jalan tak tantu
Angan lalu paham tatumbuak
Cito-cito tinggi iktikaik salah
Ukue sampai jangkolah tibo
Wakatu tibo hukuman jatuah
Takadie Tuhan sadang balaku
Jalan dialiah urang lalu
Cupak dipapek urang panggaleh
Colok tibo ragi barubah
Hilang adaik nan sabananyo
Alue batampuah jalan baturuik
Putiah manahan sasah
Hitam manahan tapo
Indak kuniang dek kunik
Indak lamak karano santan
Ameh tahan uji
Janji batapek-i
Ikrar dimuliekan
Malantiang manuju tampuak
Bakato manuju bana
Maliek contoh ka nan sudah
Maliek tuah ka nan manang
Jan tacurah bak katidiang
Jan baserak bak anjalai
Olok-olok mambao sansai
garah-garah jadi binaso
Kok dapek hanyo dari mandanga
Baiak disigi ditaliti
Nak jaleh ujuang jo pangka
Supayo indak manyasa kamudian hari
Maago di ateh rupo
Bacupak di ateh tumbuah
Batali buliah diirik
Batampuak buliah dijinjiang
Gajah tadoroang dek gadiangnyo
Harimau talompek dek balangnyo
Tarambau kabau dek rumpuik mudo
Mati ruso dek jajaknyo
Mati kuau dek bunyinyo
Aie nan tanang jan disangko tak babuayo
Aie nan tanang nan mahanyuikkan
Aka tajumbai tampek siamang bagayuik
Dahan tajulai bakeh tupai malompek
Ombak nan ketek jan diabaikan
Nan bana indak barubah
Bakato tatap di nan bana
Nan bana usah dilangkahi
Walau tacacah padang di lihie
Nan bana indak kadiasak
Hiduik nan kadipakai
Mati nan kadipagantuangi
Karajo baiak lakeh-lakehkan
Jan ditimpo karajo buruak
Karajo buruak lambek-lambekkan
Kok lai kaditimpo dek nan baiak
Saburuak-buruak untuang maniayo
Sabaiak-baiak untuang taniayo
Allah Ta'ala basipaik kadim
Manusia basipaik gawa
Nan boneh naknyo tingga
Nan hampo naknyo tabang
Nan batakuak nan ditabang
Nan babarih nan dipahek
Tinggi jan bak tinggi karambie
Tambah tinggi mancaliak kateh
Elok bak tinggi batuang
Tambah tinggi mancaliak ka bawah
Nan samba lapa
Nan kasue kantuak
Nan minum auih
Main api anguih
Main aie basah
Manumbuak di lasuang
Batanak di pariuak
Nan diinai kuku
Nan diintai itu
Barundiang jo nan pandai
Bak santan jo tangguli
Barundiang jo nan binguang
Bak alu pancukie duri
Kok nan bana dipabuek
Basaluak carano datang
Kok buruak nan tapabuek
Batimbun sabuik di pungguang
Location: Alam Takambang Jadi Guru, Dima Bumi Dipijak, Disinan Langik Dijunjuang......
Posts: 808
Rep Power: 20
Kato Pusako (36) : Parewa
Spoiler for Isi:
Urang barajo di hatinyo
Urang basutan di matonyo
Urang bakuaik di tulangnyo
Urang balabiah di pandainyo
inyo gadang nak malendo
Inyo cadiak nak maniayo
Inyo pandai nak mandapek
lndak ta-ambek tabulintang
nan Lnahariak mahantam tanah Urang lah tau di rajonyo
Urang lah tau di sutannyo
Kok duduaknyo alah bapisah
Kok tagaknyo lah bapaliang
Mancaliak jo suduik mato
bajalan di rusuak labuah
Nan turun indak di tanggo
Nan naiak indak di janjang
amuah mangguncang pucuak niro
Amuah ma-asak batu sandi
Amuah manitih tiang panjang
Amuah ma-asak pasupadan
Tau bana diasin garam
Tau bana dipadeh lado
Indak mau tau di hala haram
Malin lalu malin mati
Katik lalu katik mati
Bila lalu bila mati
Nak ka-ulah bia ulahnyo
Nak kalayuak bia lembainyo
Nak kalalu bia langkahnyo
Location: Alam Takambang Jadi Guru, Dima Bumi Dipijak, Disinan Langik Dijunjuang......
Posts: 808
Rep Power: 20
Kato Pusako (37) Sio Sio
Spoiler for Isi:
Sio-sio utang tumbuah
Bak basangai abu dingin
Bak batanak di tungku duo
Bak maeto kain saruang
Bak mambilang kasiak di pantai
Bak maetong bulu kuciang
Bak manggantang anak ayam
Bak rnanyukek baluik hiduik
Bak maambek aie ka hilie
Bak manahan gunuang runtuah
Bak mancari jajak dalam aie
Bak mancari pinjaik dalam lunau
Bak manungkuih tulang di daun taleh
Bak manyuruakkan durian masak
Bak bagantuang di aka lapuak
Bak bapijak di dahan mati
Bak manggadangkan anak harimau
Bak manggadangkan anak ula
Bak malapehkan anjiang tasapik
Bak maungkik batu di bancah
Bak manjujuang kabau saikue
Baban barek singguluang batu
Kayu tapikue di pangkanyo
Tak baban batu digaleh
Umue habih indak bajaso
Umue panjang batungkek sabuik
Usah tacinto dalam hiduik
Walaupun disapuah ameh lancuang
Kilek Ioyangnyo kanampak juo
Bagai mamaga karambie condoang
Bak ayam baranak itiak
Bak tikuih baranak puti
Anau sabatang duo sigainyo
Mandok di baliak lumbuang
Basambunyi tampak pungguang
Angan lalu paham tatumbuak
Mabuak di angan-angan
Antimum bungkuak dalam karuang
Badan jariah bajaso indak
Arang habih basi binaso
urang maambuih jariah sajo
Urang manitiak sio-sio
Tangan panek marameh
Pasu juo dapek santannyo
Awak payah mambalah anau
Urang lain dapek sagunyo
Banyao di ujuang kuku
bagayuik di rambuik sahalai
Cindai diambiak kabasaran
Location: Alam Takambang Jadi Guru, Dima Bumi Dipijak, Disinan Langik Dijunjuang......
Posts: 808
Rep Power: 20
Kato Pusako 38 : Niaik jo Janji
Spoiler for Isi:
Sanggono mudiak ka hulu
dima tuhue dima sesekan
Pusako niniak nan daulu
Lai babuhue baikekkan
Nan diarah nan dicito
Nan ditiliak nan ditimang
Nan sabarih indakkan lupo
Nan satitiak indak ka hilang
Janji arek karangan taguah
Galamo mudiak ka hulu
Mati disemba ikan tilan
Kanailah anak udang-udang
Pusako niniak nan daulu
Lai babuhue baikekkan
Kini manjadi undang-undang
Kok siang dipatungkek
Malam ka jadi kalang hulu
Dipacik arek digartggam taguah
Dibuhue dalam ikek pinggang
Siang manjadi angan-angan
Malam manjadi buah mimpi
Bapadati muatan sarek
Bangkahulu sasudah Tapan
pacik pitaruah buhue arek
Umanaik nan jan dilupokan
Siang dipatungkek
Malam dipabanta
Dilatak dalam kiro-kiro
Ditaruah di banta kalang hulu
Balaie Karantau Ikie
Di mudiak Padang Sibusuak
Singgah sabanta di Sikabau
Janji biaso juo mungkie
Titian biaso juo lapuak
Jadi pantang di Minangkabau
nan dikatokan cadiak
Kandaraan nan maha tinggi
Karano baraka
Nan dikatokan candakio
Nagari nan maha laweh
Babudi nan maha tinggi
Nan dikatokan budiman
Pakaian nan maha baiak
Kahidupan nan panuah kasabaran
Nan dikatokan arih
Palito nan tarang
Hiduik nan panuah ilmu
Anam macam nilai martabaik
Partamo kuaik manantang nan indak baiak
Kaduo suko mangaluakan harato untuak karajo nan mandatangkan kabajikan
Katigo suko maparbaiki parik paga kuliliang nagari
Kaampek suko mangarajokan usaho memperbaiki nagari
Kalimo tahu disalah bana
Kaanam suko manyalasaikan nan kusuik dalam nagari sarato tahu dibaso basi
Sabaleh macam saraik untuak bamartabaik
Partamo taliti pado ma nan baiak ma nan jahek
Kaduo banyak baharato bando
Katigo banyak mausahokan karajo nan baiak untuak isi nagari
Kaampek kasiah sayang jo suko ka urang banyak
Kalimo labiah usahonyo untuak sagalo nan ka mandatangkan kebaikan
Kaanam labiah manggunokan haratonyo untuak jalan kebaikan bagi kapantingan basamo
Katujuah indak suko jo pado pujian jo upektan urang
Kasalapan sangaik kasiah sayang jo nagari
Kasambilan pandai babicaro tabaokan taratik jo sopan santun
Kasapuluah pasiah lidahnyo babicaro nan manyanangkan hati urang banyak
Kasabaleh mamparatikan sagalo pandapek jo bicaro urang
Ampek macam nan paralu dihindari
Paratamo jan badangki-dangkian sasamo manusia
Kaduo jan hino mahinokan
Katigo jan tolong manolong pado karajo bamaksiaik jo jahek
Kaampek jan mahasuik hasuik urang untuak basangketo atau bacakak
Limo macam manusia bamartabaik
Partamo sagalo urang nan dituokan
Kaduo sagalo urang nan pandai pandai
Katigo urang nan mamarentah karajo nan patuik patuik
Kaampek urang nan manjago parik rantang
Kalimo urang kayo nan manukuak mano nan kurang
Nan mandatangkan calo kahilangan martabaik
Binaso rajo karano indak adie
Binaso kadi katiko maninggakan hukum kitab
Binaso tuo karano maninggakan taratik sopan
Binaso kampuang karano maninggakan kato mupakaik
Binaso urang mudo karano maninggakan kabebasan
Binaso manti karano maninggakan kiro kiro
Martabaik urang mudo ado limo macamnyo
Partamo baiak tampan wajah ruponyo
Kaduo barasiah pakaian jo tubuahnyo
Katigo manih muluiknyo dalam bicaro
Kaampek pandai bagaue jo kawan sahabaiknyo
Kalimo banyak ilimu jo punyo kayakinan
Martabaik urang kayo limo macamnyo
Partamo indak basipaik loba jo tamak
Kaduo dapek manutuik malu kaum keluarga
Katigo mamaliharo nagari jan binaso
Kaampek pamurah tahadok urang nan mularaik
Kalimo manjauahkan bahalo diri jo urang lainnyo
Martabaik alim ulamo sabaleh macamnyo
Partamo cukuik akil baliq dawasa umuanyo
Kaduo orang baraka indak gilo atau mabuak pasiang
Katigo bukan golongan hamba sahaya
Kaampek mangatahui hukum kitab quran jo hadih
Kalimo tahu sagalo hukum agamo, hala, haram, sah jo bata
Kaanam tahu manyalahkan jo manilai ulamo nan salah
Katujuah tahu ijtihad dalil jo manunjuakkan hum-hukumnyo
Kasalapan sihaik pandangarannyo, indak tuli
Kasambilan sihaik panglihatannyo, indak buto
Kasapuluah tahu tulih baco, indak buto huruih
Kasabaleh barani manjatuahkan hukum pado nan salah, tidak panah lalai, indak palupo jo indak pandang bulu
Duo macam pambagian gilo
Partamo gilo ketek, lakunyo bajalan hilia mudiak, indak sopan pakaiannyo, indak manjago kesehatan makan minumnyo walaupun kumuah
Kaduo gilo gadang, lakunyo indak tau dimularaik jo mupaat bagi dirinyo, baiak mambunuah dirinyo, atau urang lain, pakaiannyo buruak buruak, cumpang camping, malanggak adaik jo agamo sarato sopan santun
Laku parangai manusia tigo macamnyo
Partamo tau mambaokan diri elok diawak katuju di urang, tabaokan raso jo pareso, sakik diawak sakik pulo diurang.
Kaduo indak tahu manysuaikan diri, tahu mahinokan urang lain tapi indak namuah dihinokan, sakik diurang indak taraso sakik didirinyo, elok diurang indak elok didirinyo
Katigo indak tahu mambaokan diri, tahu dikejahatan urang, tapi indak sadar jo kejahatannyo, kalau urang lain jahek dikatahuinyo tapi dirinyo sandiri jahek indak dirasokannyo.
Location: Alam Takambang Jadi Guru, Dima Bumi Dipijak, Disinan Langik Dijunjuang......
Posts: 808
Rep Power: 20
Kato Pusako 42 : Hiduik Bapandirian
Spoiler for Isi:
Bapikia palito hati
nanang saribu aka
Taraso lamak jan dilulua
Taraso paik jan diluahkan
bajalan injek injek langkah
Bakato paliharo lidah
Hiduik jan bak pucuak aru
Maikuik kam kareh angin
Iyokan nan diurang lakukan nan diawak
Tunjuak luruih kalingkiang bakaik
Kok lah dapek kato nan sabuah
Kok bulek pantang basuduik
Kok picak pantang basandiang
Tapauik makanan lantak
Takuruang makan kunci
Janji musti ditapek-i
Ikrar harus dimuliekan
Pandirian tak namuah dipengeruahi
Inang tak buliah goyang
Kamudi nan tak buliah patah
Haluan nan tak buliah barubah
Walau lidah ka diguntiang
Kato bana disampaikan juo
Panghulu taguah di adaik
Malin taguah di Agamo
Manti taguah dibuek
Dubalang taguah dinagari
Bapantang hitam dek arang
Bapantang kuniang dek kunik
Bapantang lamak karano santan
Bapantang lapuak dek hujan
Bapantang lakang dek paneh
Sadang ditopan indak ka ganta
Kok kunun di angin sepoi basah
Takuik karano salah
Barani karano bana
Janjian arek buetan taguah
Indak lapuak dek hujan
Indak Lakang dek paneh
Satapak jan suruik
Sapadi jan di anjak
Saangin tak luluih
Salangkah tak lalu
Indak dandang mati dilauik
Antah kok lapuak digalangan
Hitamnyo manahan tapo
Putiahnyo manahan sasah
Panungkek adaik jo pusako
barih tatagak indak rabah
Kok tibo dipadang hana
Indak diruruik daun talang
Sasak kaganti suluah batuang
Kok tibo tapek di nan bana
Bapantang suruik ka bulakang
Dadak mananti ditampuruang
Bapandirian tatap di nan bana
Bajalan tatap di nan basa
Kok manyauak di hilia hilia
Kok bakato dibawah bawah
Kok ditutuik urang banda sawah
dianjak urang lantak pasupandan
Diubah urang kato bana
Baribu sabab nan datang
Busuangkan dado ang buyuang
caliak lah tando laki laki
Namuah dalam kabanaran
Jan cameh darah nan kataserak
Jan takuik nyawo kamalayang
Jan takuik tanah nan katasirah
Basilang tombak dalam parang
Walau dipancuang lihia putuih
Satapak jan namuah suruik
Nan bana diubah tidak
aso hilang kaduo tabilang
Sabalun aja bapantang mati
Namun hiduik hanyo sakali
Pado hiduik bacamin bangkai
Elok lah mati baputiah tulang
Kalo tak basuo dijalanno
Namuah bapua pua dagiang
Namuah bakacau kacau darah
Basukek darah batimbang tulang
Tando sabana laki laki
Indak bak baliang baliang diateh bukik
Baputa manuruikkan kareh angin
Samo jo pimpiang tumbuah dilereang
kama kareh angina kasinan pulo maliuaknyo
Bak lilin caia diangekkan
Kamano kelok loyang
Kasinan pulo kelok lilin
Sapantun gatah caie
Bantuak sasuai bak panampuang
Pisang sikalek kalek hutan
Pisang simbatu nan bagatah
Kok piliang inyo bukan
Budi chaniago inyo antah
Bak kabau dicucuak hiduang
Umpamo langau di ikua gajah
Bak mangganggam baro Angek
Raso ka angek dijatuahkan
Raso kabarek dilapehkan
Raso sulik diilakkan
Sapantun daun simantuang
Sabaliak hijau sabaliak putiah
Dalam bulek bapasagi
Dalam duo tangan tigo
Angguak anggak geleang namuah
Unjuak nan indak babarikan
Kahilia jalan ka padang
Kamudiak jalan ka ulakan
Kok musuah indak dihadang
Kok basuo pantang di ilakkan
Tak lalu dandang di aie
Di gurun ditanjakkan juo
Tabujue lalu tabulintang patah
Nan hampo bia nak nyo tabang
Nan boneh bia nak nyo tingga
nan dikatokan bungo sadang kambang
Katiko barundiang atau sadang bicaro dipakaikan aka jo budi
Nan dikatokan katiko angin sadang lunak
Katiko kaadaan sadang tanang aman sarato damai
Indak dek tapangaruah, indak pulo dipengaruahi
Pikiran sadang tabukak, atau budi sadang marungguah
Nan dikatokan wakatu paantaroan
Katiko antaro tinggi jo nan randah, antaro suko jo duko, antaro lapa jo kanyang, disinan paham makonyo dapek
Nan dikatokan wakatu tampek tumbuah
Katiko indak baukue bajangkoanj, indak mamiliah
Bakandak hati, dimano tumbuah disinan pulo disiangi, dimano tajadi disinan pulo ditimbang, tumbuah dialue dituruik, tumbuah diadaik dipakai, baik dakwa nan datang, baiak gayuang nan ka disambuik, baiak kato nan kadijawek
Kunci paham duo tampaiknyo
Partamo tasangkuik elok di nan tinggi
Kaduo kok talatak elok di nan gadang
Nan dikatokan tasangkuik elok dinan tinggi
Kuaso ditangan Tuhan, hiduik basarah diri, langkah rasaki, partamuan mauik, nan manantukan jo nan kuaso adolah nan Maha Kuaso, manusia bausaho, nasib Tuhan nan manantukan
Nan dikatokan kok talatak elok di nan gadang
Itulah adaik jo pusako, cupak jo gantang,
Tiok suatu jo mupakaik, apo nan diusahokan salamaik,
Manggauik sahabih gauang, maawai sahabih raso
Paham insaf paham nan tanang
Paham sangko cindorong hati
Paham sak baisi antah
Paham waham mambao lalai
Paham yakin ilimu tatap
Ujuik satu panggana bunta
Haniang hulu bicaro
Dalam saba bana nan datang
Himaik didahulukan, bahimaik dikudiankan
Paham arih balawan banyak
Paham cadiak maangan urang
Paham mati mangayuah bangkai
Jikok maninrbang samo barek
Jikok maukue samo panjang
Jikok mauji samo merah
Jikok mangati samo barek
Jikok mandidiah samo gadang
Jikok mamacik taguah-taguah
Jikok mengecek piaro lidah
Karano lidah adolah harimau manusia
Jikok maliek piaro mato
Karano mato musuah manusia
Jikok bajalan paliharo kaki
Sabab kaki dapek mancilakokan manusia
Pangka cadiak kuaik batanyo
Pangka kayo hirnaik jo luruih
Pangka Pandeka capek kaki ringan tangan
Pangka pandai rajin baraja
25th June 2010
Terkait
