Adaik, Budayo, Seni, & Sejarah Minangkabau

[dex]

Kato Pusako (24) Sadonyo Baguno

Spoiler for Isi:

Tukang indak mambuang kayu
nan bungkuak kasingka bajak
Nan luruih katangkai sapu
Nan satampok kapapan tuai
Nan ketek kapasak sanggue
Panarahan kakayu api
Angeknyo untuak basangai
Asoknyo kapanyalaien
Abunyo kapupuak padi
Indak urang mambuang urang
Nan buto paambuih lasuang
Nan pakak palapeh badie
Nan lumpuah pahuni rumah
Nan kuaik pambao baban
Nan patah pangajuik ayam
Nan binguang ka disuruah-suruah
Nan cadiak lawan barundiang
Nan pandai tampek baguru
Nan tuo tampek babarito
Nan kayo tampek batenggang
Nan bagak palawan musuah
Nan kuniang pananti alek
Nan hitam pangubak pisang
Jikok baiak samo dipakai
Jikok buruak samo dibuangkan
Jikok cadiak tampek baguru
Jikok kayo tampek batenggang
Jikok rajin disuruah-suruah
Jikok kuaik pamikue baban
Jikok barani palawan musuah
Nan lurah tanami bambu
Nan lereang tanami tabu
Nan padek kaparumahan
Nan gurun buek kaparak
Nan bancah buek kasawah
Nan munggu kapakubuaran
Nan gauang katabek ikan
Nan padang kapaimpauan
Nan lambah kubangan kabau
Nan rawang payo kaparanangan
Nan bancah ditanam baniah
Nan kareh dibuek ladang
Sawah batumpak di nan data
Ladang babidang di nan lereang
Bak batang kayu di tangah padang
Pucuaknyo cewang ka langik
Ureknyo tampek baselo
Batangnyo tampek basanda
Dahannyo tampek bagantuang
Daunnyo tampek balinduang
Bunganyo ambiak kasuntiang
Buahnyo kadimakan
Aienyo kadiminum
Elok tapian di nan mudo
Elok kampuang di nan tuo
Elok nagari dek panghulu
Elok musajik dek tuanku
Elok rumah dek bundo kanduang
Nan tuo dipamulie
Nan ketek dikasiahi
Samo gadang lawan bakawan

sumber : Buku Kato Pusako

[dex]

Kato Pusako (25) Manggunokan Wakatu

Spoiler for Isi:

Hari sahari dipatigo
Malam samalam diparampek
nan barisuak bukan kini
Nan kini bukan kapatang

Hari sahari dipatigo
Sapatigo untuak usaho
Sapatigo untuak makan
Sapatigo untuak baibadaik

Malam samalam dibagi ampek
Sabagian untuak makan
Sabagian untuak baibadaik
Sabagian untuak bapikie
Sabagian untuak tidue

Manilantang lalok mambilang kasau
Manungkuik lalok maetoang lantai
Mahereang lalok maetoang dindiang
Duduk marauik ranjau
Tagak maninjau jarah

Sakali mambuka puro
Dua tigo utang lansai
Sakali mandayuang biduak
Dua tigo pulau talampau

Dek rajin pandai nan datang
Dek malu buruak nan tumbuah
Hari pagi mananti patang
Dikana diri sarato tubuah

Kacang paringek di dalam parak
Dikarek pandan jo durinyo
Awa dikana akie tidak
Alamaik badan kasangsaro

Labiahkan jago dari lalok
Labiahkan rajin dari maleh
Labiahkan lapa dari kanyang
Labiahkan rusuah pado suko
Labiahkan hino dari mulie
Labiahkan saba dari berang

Balabiah kanyang hilang aka
Balabiah lalok hilang pangana
Balabiah maleh datang hino
Balabiah berang hilang mulie
Balabiah sidiak hilang midiak
Balabiah suko hilang budiman

Malang cilako rajo ganggang
Tuak tabali tunjang hilang
Hari pagi dibuang-buang
Hari patang dikaja-kaja

Gigi tangga rawan murah
Awak tuo gadihlah musim
Ditakan paruik dikampihkan
Hiduik baparuntuangan
Mati di tangan Tuhan
Hiduik dikanduang adaik
Mati dikanduang tanah

Sumber : buku Kato Pusako

[dex]

Kato Pusako 26 : Ba-angan-angan (Manarawang)

Spoiler for Isi:

Angan-angan sagadang gunuang
Angan-angan manarawang langik
Mabuak di angan-angan
Angan-angan mambao sansai
Angan-angan mangabek badan
Balun duduak lah maunjue
Balun tagak nak balari

Cino mati dek pitih
Ulando mati dek pangkek
Malayu mati dek angan-angan
Kaliang mati dek paruik

alang-alang si Malin Deman
Bari baikue bakapalo
Siang digilo angan-angan
Malam digilo mimpi sajo
Siang malam bahati rindu
Patang pagi bahati bimbang
alun dihimbau inyolah datang
Alun dijujai inyolah galak

Paham sarupo kambiang dek ulek
Kian iyo, kamari iyo
Rintang dimabuak angan-angan
Ciek pun indak nan masak
Denai pandangi saputangan
Denai bao manyaok muko
Tabayang adiak di angan-angan
Bilo masonyo kabasuo

Angan lalu paham tatumbuak
Sayok singkek tabang nak tinggi
Mukasuik hati mamaluak gunuang
Apo dayo tangan tak sampai

Gilo mabuak manjariang angin
Taraso lai dapek indak
Bak si bisu barasian
Bak si kuduang balangkitang
Mambilang bintang di langik
Manyukek aie dalam lauik
Manggantang kasiak di pantai

Bakalam di ujuang lidah
Bakitab di tapak tangan
Mukasuik hati maliek pulau
Sampan lai pangayuah indak
Buah masak tagantuang tinggi
Kadijuluak panggalan singkek
Kadipanjek batangnyo licin

Indak tuah nan mamuak
Indak kayo nan mamasai
Mambadai buruang ateh langik
Marandah diharok jangan

anak urang Silaiang Tinggi
Dibubuik capo diampehkan
Harok diburuang tabang tinggi
Punai di tangan dilapehkan
Bayang-bayang disangko tubuah

Bak mananti harok anyuik
Kok lai kababuah simantuang jantan
Alun baranak lah ditimang
Cadiak malam binguang siang
Gilo maukie kayu tagak

Bak mananti aie ka ilie
Bak manuntuik manggih langkeh
Elok luluaknyo sawah rang Solok
Ambiak bajak kabau tuo
Manumpang buruak ka nan elok
Kok untuang kapeh jadi suto

Babiduak usah badayuang
Badayuang badai kok tibo
Kok duduak usah bamanuang
Dek bamanuang tangih nan tibo

Disadur dari buku "Kato Pusako"

[dex]

Kato Pusako (27) Sausuai

Spoiler for Isi:

Bak rueh jo buku
Bak kapuran jo saoknyo
Bak dulang jo tuduang saji
Bak aue jo tabiang
Bak ikan jo aie
Bak baliuang jo asahan
Bak tangguak jo tangkainyo
Bak nyiru bak tampian
Bak guru bak anak sasian
Saedaran bumi jo langik
Lah di barih makan paek

Rantiang tak badatiak
Murai tak bakicau
Rantak lah sadagarn
Langkah lah sasuai

Taparosok kudo ka banda
Bari baganto kapalonyo
Elok rundingan kato bana
Nak elok kasado-sadonyo

Hukum jatuah sangketo habih
Dandam habih kasumaik putuih

Ramilah pasa Batanghari
Sabalik bapaga kawek
Randah tak dapek dilangkahi
Tinggi tak dapek kito panjek

Bia lambek asa salamaik
Tak kan lari gunuang dikaja

Bak jangguik pulang kadaguak
Bak ayam pulang ka pautan
Bak santan jo tangguli
Bak pisang masak saparak
Bak pinang dibalah duo
Bak bulan jo matohari

Mamacik bungka tak batolok
Mamacik taraju indak kiri
Mamagang gantiang putuih
Mambao biang tabuak

nan gadang dilambuak
Kok tagak indak tasundak
Kok malenggang indak tapampeh

Nan diama pacah
Nan dimukasuik sampai
Nan dikana salamaik
Nan disangajo lah jadi pulo
Bak gurun ditundo aie

Lah dirasuak manjariau
Lah dikasau lakek atok
Tungku lah tigo sajarangan
Bak tali tigo sapilin

Bulek lah buliah digolongkan
picak lah buliah dilayangkam
Tampan sudah langgam tabao
Sapantun intan baikek ameh
Umpamo pisang masak saparak
Dijujuang bak mangkuto
Ditanai bak kumalo
Bak pucuak diluncuekan
Bak kambiang putuih talinyo

Nan patah datang batungkek
Nan buto datang bairik

Muluik manih kucindan murah
Ayam nan tangkeh di galanggang
limpapeh rumah nan gadang
Acang-acang dalam nagari

Manahan sulo jo rajam
Manahan sapik jo guntiang
Manahan godam jo garagaji
Manahan tukue jo paek

Dek elok kato baiyo
Dek rancak kato mupakaik
Lah dapek kato nan sasuai

Sairiang langkah sarantak
Sasuaikan muluik jo hati
Lamak di awak katuju di urang
Jadinyo sanang dalam nagari

Bumi sanang padi manjadi
Padi kuniang jaguang maupiah
Taranak bakambang biak
Nagari aman santosa

Saajuik sapangana
Saayun sapakuak
Salangkah sapijak

alah patuik dek katuju
Alah mambali manang mamakai
Bak balam jo katitiran
Anak rancak minantu santiang

Taracak di undang, tasangkuik di limbago
Tampan sudah langgam tabao
Di mudiak sabulak-an, di hilie samuaro
Sapantun intan baikek ameh

Bak anak balam
Sikuejantan
Sikue batino
satali tigo uang

Nan elok kato baio
Nan rancak kato mupakaik
Lah dapek kato nan salasai

Tando-tando badan sihaik
Bakarajo badan bapaluah
Kalo makan nasi batambuah
Kok lalok tidue bakaruah
Kok tacirik diajan Lasuah

Sumber : Buku Kato Pusako

[dex]

Kato Pusako (28) : Takabua (Pongah Sombong)

Spoiler for Isi:

Batunjang batang aro
Batunjang pulo malin-malin
Bak ilimu antilabuang
Indak bapucuak di ateh anau lai

Main bada main pulo garundang
Bak bujang jolong bakarih
Bak gadih jolong basubang
Bak sibuto jolong maliek
Awak randah sangkutan tinggi

Kecek malauak-lauak
Makan jo sambalado
Kapoak gadang kapopoh
Gadang bungkuih indak barisi
Makanan anggang dimakan pipik

Hawa pantang karandahan
Napasu pantang kakurangan
Pandai indak usah dilagakkan
Jaditakabue kasudahannyo

mangapik kapalo harimau
Maanjuangkan diri bak sipasin

Jikok bungo sadang bacahayo
Banyaklah kumbang nan manggilo
Jikok awak ditampuah kayo
Sombong datang congkak pun tibo

Angkuah tabao tampan tingga
Bagaduak-gaduakkan diri
Saku-saku ditabangkan angin

Indak baudang di batiak batu
Indak banasi di baliak karak
Manjilih udang, ciriknyo di kapalo

Tangendeang biduak rang Nareh
Dihantak biduak rang Bayue
Geleang bak geneang siriah areh
Indak takana tampuak layue

Buah kuwini buah ambacang
Jan diuruik padonyo jatuah
Bunyi kecek marandang kacang
Bunyi muluik mambaka buluah

Mangkonyo bariak aie di kolam
Dek karano banyaknyo limbek
Laku bak lonjak labu dibanam
Bak umpamo kacang diabuih ciek

Dikacak batih lah bak batih
Dikacak langan lah bak langan
Tinggi lonjak gadang gaIapue
Umpamo tabuang sarueh
Bak kancah taweh harang

Udang tak tau dibungkuaknyo
urang tak tau diburuaknyo
Manyalo jo minyak urang
Manggoreang jo minyak bamintak

Lonjak bak labu dibanam
Bak lonjak alu paampiang
Bak kambiang barago duo kupang
Bak kambiang barago tigo tali

Batareh kalua bak pimpiang
Basisiah atah jo bareh
Indak Pandeka nan tak Buluih

Padi di ladang barumpuikkan
Batang salibu nan dikisai
Hati nan gadang dipaturuikkan
Indak dikana hiduik ka sansai

Bariak tando tak dalam
Baguncang tando tak panuah

Sumber : Buku Kato Pusako

[dex]

Kato Pusako 29 : Panyasalan

Spoiler for Isi:

Urang Talu manjua rotan
Uang Tiagan manjua bungo
Sasa dahulu pandapatan
Sasa kamudian indak baguno

Rumah sikola di Parabek
Tampak nan dari Bukittinggi
Sasek manjamue ampo barek
Tibo di lasuang ditangisi

Tabali dikabau batuntun
Bak aie jatuah ka kasiak
Bak batu jatuah ka lubuak
Bak manggadangkan anak harimau
Bak malapehkan anjiang tasapik

Anak Daik bamain tambue
Cincin parmato jatuah di ruang
Jikok nasi lah jadi bubue
Aie mato Jan dibuang-buang

Bukik Putuih Rimbo Kaluang
Dirandang jaguang digulo-i
Hukum putuih badan tabuang
Dipandang gunuang ditangisi

Kawan galak mudah dicari
Kawan manangih jarang basuo
Kawan hiduik paralu ditaliti
Indak jadi sasalan kasudahannyo

Sasuaikan muluik jo hati
Indak lain di lua, lain di dalam
Dari badoso jauhkan diri
Supayo jan jadi sasalan

Kudo balang bacampue putiah
Rancak diambiak untuak pacuan
Kok ka lai mandapek boko
Usah kito talampau piliah C
apek sajo ambiak putusan
Lah jadi sasalan mambuek bedo

Sasek suruik, talangkah kumbali
Kalo dulu disasali, jadi tuah pandapatan
Luko indak kumanyiuik
Mati indak kamanyasa

Cilako malang ba-ayam
Padi masak makan ka hutan
Ayam lapeh tangan bacirik
Bak takaca di cirik ayam

Bak anjiang kadahuluan
Bak bajanji jo urang jauah
pitih habih taragak tumbuah
Awak kalah galanggang usai

Kaki lah talangkahkan
Tangan lah tajombokan
Nasi lah jadi bubue
Indak dapek dikadang Iai
Sasa indak tumbuah dahulu

Jikok dikaka si daun paku
Jatuah badarai si daun lado
Jiko dikana maso nan lalu
Jatuah badarai aie mato

Sumber : Buku Kato Pusako

[dex]

Kato Pusako (30) Kalakuan

Spoiler for Isi:

Laku nan elok sapuluah macamnyo
Pandai maratokan pagaulan, indak di randah ditinggikan
Pandai-pandai manenggang raso dalam babaue samo gadang
Pandai maagak maagiahkan, dibaliak-baliak mangko dibalah
Pandai baliku di nan tarang, pandai balinduang di nan paneh
Pandai maambiak patangahan, laku elok baso katuju, manapek-i sagalo janji, tunduak patuah di nan bana
Elok parangai, duduak tagak tabaoan, taratik minum makan
Anggoto nan tujuah samo dijago, balaku arif bijaksano
Mangarati jo tunduak ka undang-undang sarato ka adaik jo limbago
Banyak ilimu pangatahuan, sabanyak bintang di langik, sapanuah aie di lautan

Laku nan buruak sapuluah macamnyo
Elok baso indak katuju
Baiek budi indak manantu
Gadang sanduak indak mambao
Gadang suok indak manganyang
Kareh hantak indak luluih
Elok tungkuih indak barisi
Banyak agak indak mamutuih
Gadang garogok indak bamalu
Kareh latuih indak barasok
Kuaik dantam indak babunyi

Lai ketek taranjo-anjo
alah gadang tabao-bao
Lah tuo taubah indak
Sampai mati jadi parangai

Tabiaik pantang baubah
Karano tabiaso jadi parangai
Sampai tuo jadi pakaian

Galeang kapalo bak sipatuang inggok
Lonjak bak labu dibanam
Tinggi lonjak gadang galapue
Namun lago di bawah sajo
Umpamo tabuang sarueh
Bak kancah laweh harang
Bak kacang diabuih ciek

Diatai mako diatun
Marasai makonyo santun

Banyak udang banyak garamnyo
Banyak urang banyak ragamnyo

Sumber : Buku Kato Pusako

[dex]

Kato Pusako (31) : Batikai dalam Saiyo

Spoiler for Isi:

Buah palo buah mangkudu
Paringek tumbuah di rimbo
Walau kapalo samo babulu
Pandapek babedo-bedo

Balaie biduak rang
Tiku Tampak nan dari si Tinjau Lauik
Basilang kayu dalam tungku
Di sinan api mangkonyo iduik

Kato surang dibulek-i
Kato basamo dipaiyokan
Sairiang batuka jalan
Saiyo batuka sabuik
Batupang pangka saiyo

Walau salisiah bak kilangan
Batingkah bak talempong
Sungguh batalun bak bagandang
Lain gendeang panokok
Asiang pulo kacundang sapik
Di lahie nampak batuka
Di batin paham sasuai

Kok samo tinggi kayu di rimbo
Kamano angin kabaputa
Pariuak sanduak lai balago
Kok kunun pulo manusia

Pandai bakisa duduak
Bapaliang di lapiak nan sahalai
Pandai bakisa tagak
Bakisa di tanah nan sabingkah

bajalan surang nak daulu
Bajalan baduo nak di tangah
Takuruang nak di lua
Tahimpik nak di ateh
Tagang nan bajelo jelo
Kandue nan badantiang-dantiang

Sangaik lahienyo tasambunyi
Sangaik batinnyo kaliektan

Dapek nan di hati
Indak dapek bak kato hati
Dapek bak kato hati
Indak dapek nan di hati

Awa lawannyo akie
Lahie lawannyo batin
Baiak lawannyo jahek
Ado lawannyo indak ado
Iyo lawannyo tido

Duduak surang basampik-sampik
Duduak basamo balapang-lapang
Sampik lalu, lungga batokok

Sumber : Buku Kato Pusako

[dex]

Kato Pusako (32) : Tarang Jaleh

Spoiler for Isi:

Siang bak hari
Tarang bak bulan
Singkok daun tariak buah
Kubak kulik tampak isi

Maliek tuah ka nan manang
Maliek contoh ka nan sudah
Manuladan salalu ka nan baiek
Batampuak buliah dijinjiang
Batali buliah di-irik
Buleklah buliah digolongkan
picak lah buliah dilayangkan
Data balantai papan
Licin badindiang camin

Kok jauah buliah ditunjuakkar
Kok dakek buliah dilakokkan
Jalan pasa nan dituruik
Labuah gadang nan ditampuah

Gadang ombak liek pasienyo
Gadang kayu caliak pangkanyt
Tatukiak jajak mandaki
Tasidorong jajak manurun

Kato hiduik banyao hiduik
Kato mati bapambunuahan
Lahie jo batin saukuran
Isi kulik umpamo lahie
Gayuang basambuik kato bajawab
Imbauan biaso basahuti

Lah tabang gagak ka gunuang
Lah pulang itiak di sawah
Lah masuak ayam ka kandang
Malangkiang caciang dalam tanah
Tando alamaik harilah sanjo

Indak basuluah batang pisang
Basuluah bulan jo matohari
Bagalanggang mato rang banyak
Tarang balateh indak tarang balendo

Ayam putiah tabang siang
Hinggok di batang mararasi
Batali banang batambang tulang

Manti bajalan di nan kalam
adaik bajalan di nan tarang

Babaun bak ambacang
Basuriah bak sipasin
Bajajak bak bakiak
Tapijak di baro hitam kaki
Tapijak di kapue putiah kaki
Litak takaca auih tarabo
Taikek takabek
Tatando tabuti
Latiah takaja
Batunggue bapanabangan
Basasi bakatarangan

Nak tau dipadeh lado
Nak tau dimasin garam
Manembak baalamaik
Bakato batujuan
Balaie manuju pulau
Bajalan sampai ka bateh

Kok batali buliah di-irik
Kok batampuak buliah dijinjiang
Kok urang nan dipacik keceknyo
Kok kabau nan dipacik talinyo

Karano takuik bapumpun abu
Jikok babatulan babayaran
Basalahan mako bapatuik
Jikok barabuik katangahkan
Jikok kalah bakatunduak-an
Jikok badagang batimbalan
Jikok mangati samo barek
Jikok hilang nyato rimbonyo
Jikok mati nyato kubuenyo

Anak harimau balang juo
Lipek paruik jaleh lipiknyo
Samupakaik mako babaue
Jikok batikai pacaraian

Batuang bulek indak basagi
Pipik jantan indak basarang
Nan tinggi tampak jauah
Nan gadang jolong basuo

Kalo tak kanai di ujuang karih
Kanai singanga mati juo
Jiko tak jaleli corengnyo barih
Tando biti kadapek juo

Indak salamonyo hari hujan
Indak salamonyo hari paneh
Hujan jo paneh siliah baganti
Siang jo malam bagantian

Sumber : Buku Kato Pusako

[dex]

Kato Pusako 33 : Indak Baguno (Mubasie)

Spoiler for Isi:

Manang indak kamanarimo
Kalah indak kamambaie
Masuak tak ganok
Kalua tak ganjie
Masuak di talingo suok
Kalua di talingo kida

pai ampok pulang aban
Masuak hawo kalua angin
Masuak ampek kalua limo
Bak antimun bungkuak dalam karuang
Indak masuak dalam etongan

Bak mangandakkan cirik harimau
nan tagantuang diikuenyo
Mangandakkan tanduak ka kudo
Mangandakkan kuah ka pangek

Manyalang sanjato di paparangan
Mintak tolong di panyamunan
baraja dalam baparang
Pandeka dalam bamusuah

Managakkan sumpik indak barisi
Managakkan banang basah
Mambasuah muko jo aie liue
Mambasuah arang di kaniang

Kecek bak katiak ula
Kecek bunyi marandang kacang
Manggantang asok maukie langik
Maranangi lauik lapeh

Mabuak di angan-angan
Tak baban batu digaleh
Sarueh tabu dek ulek
Kasabatangannyo dibuang
Umue habih indak bajaso
Sio-sio utang tumbuah
Tuah dihajan cirik tapanca
Arang habih basi binaso
Minyak abih samba tak lamak
Kalah jadi abu
Manang jadi baro

Tabu satuntuang masuk garaman gajah
Manembak buruang jo mariam
Mancukie kuman jo alu
Mancari kutu dalam ijuak
Mancari jajak dalam aie
Bak manggantang anak ayam
Bak manyukek baluik hiduik
Bak mancari pinjaik dalam lunau

Mamakiak ka langik hijau
Nan hilang indak kabasuo
Abih minyak sapasu
Ikue anjiang indak kaluruih

Maandok di baliak lumbuang
Basambunyi tampak pungguang
Maandok di baliak ilalang salai

Bak balacan dikarek duo
Nan pai busuak
Nan tingga anyie

Lai ketek taranjo-ranjo
Lah gadang tabao-bao
Sampai tuo taubah indak
Sampai mati jadi parangai

Sabusuak-busuak dagiang
Dikunyah dimakan juo
Saharum-harum tulang
Dibuangkan sajo

Sarueh tabu dek ulek
Kasabatangannyo dibuangkan

Sumber : Buku Kato Pusako